2Cor 1 | ATA | STEP | Eni Paulo itema e Kalisito Iesu mupalusilo no anu masaxa noxou Lataua mo musosovosilo. Nexi noxou vivilo Timoti takaukavu uoli voloxu ano 'o ulai noxinge ta mitema ilotu noxou Iesu ne Kolinito, mo noxi'a ta mitema ane'i imulaxu tane'i noxou Lataua no 'a tuatuala ukalusi no lia tila ne Akaia.

a 1:3Rom 15:5

b 1:5Lex 34:19

c 1:8Apo 19:23; 1Ko 15:32

d 1:102Ti 4:18

e 1:142Ko 5:12; Pil 2:16

f 1:161Ko 16:5-6

g 1:19Apo 18:5

h 1:20Pal 3:14

i 1:222Ko 5:5; Ep 1:13-14

j 1:241Pi 5:3

2 Corinthians 1

1 Eni Paulo itema e Kalisito Iesu mupalusilo no anu masaxa noxou Lataua mo musosovosilo. Nexi noxou vivilo Timoti takaukavu uoli voloxu ano 'o ulai noxinge ta mitema ilotu noxou Iesu ne Kolinito, mo noxi'a ta mitema ane'i imulaxu tane'i noxou Lataua no 'a tuatuala ukalusi no lia tila ne Akaia. 2 Alauna mo opo se'isisi ulai noxinge molu noxou Lataua Maminge mo anu Tila Iesu Kalisito

Anu Lataua sou Mamaatola Tapiena Ukalusi

3 ^aTa'itinu Lataua e Tila noxinge Iesu Kalisito Momu, anu tanutanuxu Momu anu Lataua sou mamaatola piena ukalusi. 4 Anu e mamaatolanenge no anu tu'utu'umaxu noxinge ukalusi, mo sou nexi tamomomo sou mamaatolane'i ane'i ane tu'utu'umaxu se'i uxalisi'a no anu vaikalau Lataua ane Anu mulosienge. 5 ^bXo anu aloxo tu'utu'umaxu noxou Kalisito unixi u'una no anu maulinenge 'o ne la mamaatola molu noxou Kalisito ne iouvilesisi unixi une'e u'ana'ana kalumo. 6 Lexe oponexi tu'umaxu, la anu ne sou umamaatolanenge no 'a mauli noxixe, lexe nexi tano'u vaikala la anu ne sou umamaatolanenge ane uxalixu 'ilixo sou ngaxolu se'isisi mo ngatavulenu tu'utu'umaxu ane loxo nexi tatavulenu 'o. 7 Mo loopala noxixesinge ne anu pumuxu, xo nexi telavu lexe aloxo tu'utu'umaxu noxixe ne ngingi ngatavulenu kalumo la mamaatola noxixe ne ulai noxinge kalumo. 8 ^cTa vivixe, nexi tamasaxa manina lexe ngingi ngelavusou, sou tu'utu'umaxu ane nexi tetavulenu no anu xalee lia tila ne Asia. Tu'utu'umaxu ane ne anu tatila manina mo umomomo sou nexi tataloxolixu la uasi mole nexi ne lexe tasoli avile. 9 Manina, no nano no tanexi la nexi taxamulinu tu'umaxu sou soli. Ia anu muxali ne sou lexe nexi tamomomo sou tasoa noxixe mamu ia noxou Latauasi, Anu e utulusi'a ta mitema no 'a soli. 10 ^dAnu mupamulinexi no anu masua sou soli ane loxo ne, mo Anu upamaulinexi. Nexi teloopalanu lexe Anu usolonu sou upamaulinexisi. 11 Xo aloxo ngingi ngesu'ulinexi no anu lakilaka noxinge. La sou tapiena imomomo sou ivikala laixe noxou Latauamenge sou alauna laixe mune'e noxixe loxo lakolisou lakilaka noxi'a tapiena.

Paulo Muxiunu Xavutala E Anu Muloonu

12 Ioxe nexi ta'itinexi aloxo, xavutalamexi laixe noxi'a ta mitema ne mumaxa'ixe lamana lexe no anu xoluxolunenge nenge'a no anu lialia 'o ne la nexi texolu no anu 'ilixo vilemo mo malemalenga ane molu noxou Lataua. Nexi te'oxonu aloxo ne loxo no anu xavuxavutala e talavusou lexe mii ane laixe xe mii ane masua sou lialia 'o uasi ia loxo no anu alauna noxou Latauasi. 13 Xo nexi takaukavumengixu mii vile ane ngingi ngamomomo sou ngaitisou mo ngalavu sou uasi ne uasi. Eni eloopala lexe ngingi ngalavusou mimii lamana ukalusi. Mo eni eloopala lexe, 14 ^ealoxo ngingi ngelavusixe sevilesi ia ngingi ngalavusixe ukalusi, la ngingi ngamomomo sou nga'osasixe ne aloxo nexi ta'osasinge kalumo no anu voxo noxou Tila Iesu.

15 Anu aloxo ne xo eni exavutala pekia'u no anu mii ane 'o, eni emulaxu xavutala sou akilisinge tei o mo sou ngingi ngamomomo sou ngano'u su'uli alaxu tamei. 16 ^fEni emulaxu xavutalaxeni lexe sou akilisinge no mine alai ne Makedonia xe melo ne Makedonia ane'e la alivu ane'e noxinge, xe ili'i la sou ngingi ngasu'ulileli sou ngasaxaleli sou alai ne Iutaia. 17 No mine eni emulaxu xavutalaxeni sou mii ane ne la, loxovaa eni e'oxonu papaxesi? Uasi loxovaa eni e'oxonu sou emulaxu xavutalaxeni loxo ane'i ta mitema no lia 'o ixavutala 'o si mo sou eni avikala ukeikei lexe “Ee, la ee” no mine “Uasi, la uasi?” Aloxo ne uasi. 18 Ia manina sou aloxo Lataua anu umulinu vaikalausi, la sou a'alo noxixe ulai noxinge ne anu loxo “Ee,” xe “Uasi,” la uasi. 19 ^gXo Lataua 'Olu Iesu Kalisito e nexi noxi'a Sailasi mo Timoti telaanu vaikalasou nonixi noxinge ne anu loxo “Ee,” no mine “Uasi,” ne uasi ia noxou ne la anu utotomu ne “Ee,” si. 20 ^hXo mii vile uasi mii tapiena anu Lataua musakiinu vaikalasou ne anu muxali “Ee,” noxou Kalisito. Anu aloxo ne la sou noxousi ne la “manina” ne nenge ta'itinu Lataua ualasou. 21 Ioxe la sou anu Lataua e mupitanenge no anu mauli noxou Kalisito anu molu musosovosinge la sou nenge'a tatulu peki'ainge. 22 ⁱMo mu'italonu sosovo noxou mo mutomusinge lexe nenge ta na'u ne muxolu noxinge. Mo mumulaxu Uleenu no nano no tanenge aloxo sosovo sou mii mai'a ane Anu ulosinge ili'i.

23 Eni alemolu la Lataua mulavusou xavutalaxeni aloxo ne mo eni talelingenge sou lexe alivu alai ne Kolinito uasi. 24 ^jAnu loxo nexi tauli sou taulaxu tangengi uasi. Ia nenge nenge'a taxaxai ne sou 'osa'osamengi. Xo tava'u aloxo, ngingi ngamulaxu tangengi la ngatulu peki'ainge.